Meriggio austo


Meriggio austo, ancora nu meriggio.
Fore 'o balcone 'o frisco, 'nsilenzio,
munnamme fagiuline.

Che posa antica, cara mugliera!
Cagna 'a materia: allora 'a lana,
mò 'e fagiuline, ma 'a posa è 'a stessa,
de' viecchie spuse 'nsieme.

Tira na streppa a uno, tira na streppa a n'ato,
chisto 'o scartammo, chisto invece è buono.
Penzo: accussì, può darse, quaccuno fa'
cu 'e iuorne nuoste, cu sti vite noste...

Troppi penziere! Troppa filosofia! po' dico...
E aizo l'uocchie 'ncielo, speranzuso.

E botto, passa na chiorma 'e passere alluccanno,
pare che dice: "Nun 'nce vide a nuie?...
Gudimme 'o sole, l'aria 'e chest' està...
e quanno sarrà vierno... po' se vede