Matenata nvilla


Matenata nvilla, ncopp' 'a panchina 'o sole,
cuièto guardavo 'e fronne, 'o cielo, 'a gente.
"Tié mente comm'è vispo e chino 'e vita,
zompa e zumpette, nun s'arrepose maje.
Isse e n' arillo songh 'a stessa cosa",
pensave rimiranno nu guaglione
ch'allero sfruculiave nu pallone.

Passaino dduie nnammurate a passo lento,
uocchie in' 'a ll'uocchie, mane dint' 'a mano.
"Che bella cosa ammore", suspiraie,
"che ricca cosa ammore int' 'a l'està !"
E me senteve na carezza nfaccia,
na capa bionda liggera 'ncopp' 'a spalla.

Ma 'e botte sicco m'arrivaie 'o pallone:
"Guagliò, ma statte attiente", l'alluccaie,
"Nun può ghiucà cchiù chiano, ce stà gente!",
po' ntenerito da faccella 'e chianto:
"Quant'anne tiene, guagliò, quant'anne tiene?"
"Nov'anne, 'o nò, nov'anne e vuie?"

'O core me zumpaie a chella dumanna,
'a capa bionda s'aizaie d' 'a spalla.
"Tante guagliò, so tante !... lassa stà!",
po' rispunnette amaro a meza voce:
"Và a pazzià 'o pallone, statte attiento"